السلام عليكم ورحمة الله وبركــاته.
قبل فترة لاحظت فرق كبير مابين المتصفح العربي والمتصفح الانجليزي.
لاحظت ان المحتوى قليل عندنا,بمعنى صاير فيه شح بالمعلومات"إذا بغيت تبحث عن موضوع معين"
بعكس المتصفح الانجليزي. غني بالمعلومـات والتجارب,أشياء بسيطه ماخطر على اي احد منا يسويها او يكتب عنها
ومع ذالك تلقى من تكلم عنهـا وجربها وهالشي يخلينا نوصل لقناعة إن مانحقر شي.
اي كـان اهتمامك تكلم عنه,ممكن احد يشاركك نفس الاهتمام يمكن احد يحب هالمجال منك !
لا تستصغر شي بس لان ماله جمهور.انقل تجاربك ولو كانت اد الفتفوته هههه
نرجع لـ موضوع المتصفحات , شح المصفح عندنـا خلاني اتساءل عن الأسباب!
هل الشعوب العربية إتكالية بحيث انها تبي المعلومة تجيها على طبق من ذهب ؟
او انها ماعندهـا الثقه العالية انها توصل المعلومة للمتلقي ؟
على العموم اي كانت الأسباب,لازم نبدا ننعش المتصفح ونكتب عن اي شي مفيد مهما كان حجمه
تجارب - نصائح - معلومات -فلسفه وفضفضه -.... علشانا وعلشان الأجيال اللي بعدنـا تستفيد.
وللمعلومية السوشل ميديا تويتر انستا مايعتبر مرجع اساسي اذا بغيت تبحث.لان مافي خاصية البحث الدقيقة مثل مافي قوقل.
http://www.wikihow.com/Main-Page
wikihow من المواقع احبها.موقع يضم كل المعلومات والنصائح لـ اي شي ببالكم.
كل مافضيت وطرى على بالي شي معين ابحث عنه عندهم.
وللامانة مايكون مقصدي بحت المعلومة ! لا ابي اطور مستواي بالانجليزي اكثر.
على العموم حابة ان يكون فيه موقع ممثال له بالعربي.بحيث الكل يشارك ويكتب اللي عنده.
مو لازم الكل يكون خبير ومعه شهادات علشان يكتب, الكتابة حق للكل دامه عنده فكر وهدف يبغى يوصله للعالم.
